Heddiw, mae Ymddiriedolaeth Natur De a Gorllewin Cymru yn cyhoeddi grant o £2.2 miliwn gan Gronfa Dreftadaeth y Loteri Genedlaethol i wella hygyrchedd a chynhwysiant Canolfan Bywyd Gwyllt Cymru i ymwelwyr wrth gynnig cyfleoedd gwell i ymgysylltu â chynulleidfaoedd ehangach. Mae Cronfa Gymunedol y Loteri Genedlaethol wedi dyfarnu grant o £90,000 i gefnogi gwaith y prosiect gyda chynulleidfaoedd a grwpiau newydd, gan feithrin cysylltiadau dwfn â byd natur i helpu tuag at adferiad byd natur ac ar gyfer y manteision iechyd a lles y mae byd natur yn eu cynnig.

Dywedodd Sarah Kessell, Prif Swyddog Gweithredol Ymddiriedolaeth Natur De a Gorllewin Cymru: “Rydyn ni wrth ein bodd yn derbyn y gefnogaeth hon gan Gronfa Dreftadaeth y Loteri Genedlaethol a Chronfa Gymunedol y Loteri Genedlaethol. Diolch i chwaraewyr y Loteri Genedlaethol, fe allwn ni sicrhau bod pob un o’n hymwelwyr ni yng Nghanolfan Bywyd Gwyllt Cymru yn cael yr un cyfleoedd, bod persbectif pawb yn cael ei werthfawrogi a bod pawb yn cael eu hannog i gymryd rhan yn adferiad byd natur mewn ffyrdd sy’n addas iddyn nhw.”

Mae Canolfan Bywyd Gwyllt Cymru wedi'i lleoli yng Ngwarchodfa Natur Corsydd Teifi, y mae llawer ohoni wedi'i dynodi oherwydd ei phwysigrwydd i fywyd gwyllt. Mae'r warchodfa natur yn boblogaidd gyda thwristiaid ac ymwelwyr lleol, gan roi cyfle i bobl ddod yn agos at fywyd gwyllt o rwydwaith o guddfannau adar, llwybrau pren a llwybrau cerdded sy’n cynnwys llwybr Sustrans. Gall ymwelwyr weld amrywiaeth ehangach o adar gan gynnwys Glas y Dorlan, yn ogystal â Dyfrgwn, gweision y neidr a mursennod. Mae'r warchodfa natur yn ehangu felly yn y dyfodol bydd yn darparu mwy fyth o fynediad at fywyd gwyllt. Adeiladwyd y ganolfan ymwelwyr 30 mlynedd yn ôl ac enillodd ei dyluniad trawiadol Wobr RICS ond mae angen buddsoddiad bellach. Mae'r adeilad yn darparu cyfleusterau a lle i ddysgu am y warchodfa natur ac mae'n cael ei gefnogi gan dîm gwych o wirfoddolwyr.

Gweithiodd yr Ymddiriedolaeth gyda grwpiau cymunedol lleol i ddylunio prosiect sy'n cynnwys mwy o brofiadau awyr agored sy'n gysylltiedig â bywyd gwyllt, rhaglen ddysgu gymunedol sy'n cyfuno celfyddydau creadigol ac ecoleg, a gwelliannau ffisegol i'r ganolfan i gael gwared ar rwystrau mynediad, ei gwneud yn fwy cyfforddus ac ymgorffori cyfathrebu cynhwysol.

Mae'r Ymddiriedolaeth Natur eisiau gweld natur mewn adferiad felly maen nhw eisiau i bawb gael yr un cyfleoedd i brofi a mwynhau bywyd gwyllt, cymryd rhan a chyfrannu eu syniadau a'u hegni. Mae Canolfan Bywyd Gwyllt Cymru yn borth i dreftadaeth naturiol gwarchodfa natur Corsydd Teifi felly gwella mynediad a chynhwysiant yw’r flaenoriaeth.

Bydd Ymddiriedolaeth Natur De a Gorllewin Cymru yn cynnal rhaglen o ddigwyddiadau drwy gydol y prosiect 3 blynedd hwn felly cadwch lygad ar ei gwefan a'i sianeli cyfryngau cymdeithasol.

Dywedodd Andrew White, Cyfarwyddwr Cronfa Dreftadaeth y Loteri Genedlaethol yng Nghymru: "Rydyn ni wrth ein bodd yn cefnogi'r gwaith o drawsnewid Canolfan Bywyd Gwyllt Cymru yn borth gwirioneddol gynhwysol i dreftadaeth naturiol Cymru. Diolch i chwaraewyr y Loteri Genedlaethol, bydd y buddsoddiad yma o £2.2 miliwn yn gwneud gwelliannau i'r ganolfan ymwelwyr, yn gwella hygyrchedd, ac yn datblygu rhaglenni wedi'u targedu i gyrraedd cynulleidfaoedd ehangach. Mae'r prosiect yma'n cynnig cyfle i oresgyn rhwystrau a chreu cysylltiadau dyfnach rhwng cymunedau amrywiol a bywyd gwyllt rhyfeddol Corsydd Teifi am genedlaethau i ddod."